Sa kabila ng pagiging mabait sa kabit ng Mister, isang Ginang sa bayan ng Cajidiocan, Romblon ang pinagsusuntok, pinagsisipa, at pinagsasampal ng kanyang asawa nitong umaga ng August 2, ayon sa report na nakarating sa Romblon Police Provincial Office.
Batay sa report, nangyari ang insidente sa Barangay Poblacion bandang alas-8 ng umaga.
Kakauwi lang umano ng tunay na Misis galing sa Sibuyan District Hospital para asikasuhin ang na-confine na kabit ng kanyang Mister, nang magtalo silang mag-asawa. Itinanong umano ni Misis sa kanyang Mister ang hospital bills ng kabit nito ngunit nainis umano si Mister at bigla nalang sinampal ng ilang beses si MIsis.
Hindi pa nakontento si Mister at nagawa pang sipain, at pagsusuntukin ang kanyang asawa sa iba't ibang bahagi ng kayang katawan.
Matapos umalis si Mister sa kanilang bahay para magpahangin, agad na nakakita ng pagkakataon si Misis para tumakas at tumungo sa Cajidiocan Municipal Police Station para isumbong ang pambubogbog na ginawa sa kanyang may kabit na Mister.
Bandang alas-12 ng tanghali, agad na nagsagawa ng operasyon ang mga kapulisan para maaresto ang suspek na noon ay nakabalik na sa kanilang pamamahay.
Nakakulong na ngayon ito sa Cajidiocan Municipal Police Station at inaashang sasampahan ng kasong paglabag sa Republic Act 9262 o mas kilalang Anti-Violence Against Women and their Children act.
Sadyang hindi pinangalanan ng Romblon News Network ang mga sangkot sa insidente base na sa hiling ng mga kapulisan.
Paalala ng mga kapulisan sa mga lalaki, laging igalang at huwag na huwag sasaktan ang mga kababaihan dahil siguradong kulong sila kung lumabag sila rito.
