Pinaghahandaan na ng Odiongan Water District (OWD) ang posibleng epekto ng El Niño upang matiyak ang sapat na suplay ng tubig para sa mahigit 3,200 kabahayan o tinatayang 14,000 residente ng bayan ng Odiongan.
Sa isinagawang inter-agency meeting noong Hulyo 15, sinabi ni OWD General Manager Engr. Carlos Formilleza na kabilang sa mga hakbang ng ahensya ang paghahanap at pagpapaunlad ng mga bagong mapagkukunan ng tubig sa Barangay Rizal at Barangay Taboboan.
Ayon kay Formilleza, may nakalaan nang pondo para sa pagtatayo ng bagong water source sa Barangay Rizal. Dagdag pa niya, handa ring umutang ang OWD sa Local Water Utilities Administration (LWUA) kung kinakailangan upang pondohan ang pagpapaunlad ng karagdagang water source sa Barangay Taboboan.
Ang paghahanda ng OWD ay kasunod ng babala ng Philippine Atmospheric, Geophysical and Astronomical Services Administration (PAGASA) na may mahigit 60 porsyentong posibilidad na lumakas ang El Niño sa mga huling buwan ng taon at maaaring tumagal hanggang unang bahagi ng 2027.
Sa pagpupulong, napagkasunduan din ng mga kinatawan ng iba't ibang ahensya ng pamahalaan na maghanap ng karagdagang pondo mula sa Lokal na Pamahalaan ng Odiongan at sa tanggapan ni Congressman Eleandro Jesus Madrona upang masuportahan ang mga kinakailangang proyekto sa suplay ng tubig.
Nanawagan din si Formilleza sa publiko na magtipid sa paggamit ng tubig bilang paghahanda sa posibleng epekto ng tagtuyot.
“Ang panawagan ng OWD para sa aming mga consumers ay magtipid. Hangga't maaari ay limitahan ang paggamit ng tubig. Halimbawa, sa paglalaba, kung puwede ay gamitin ang pinaghugasan sa pandilig. Tingnan din natin ang mga leak upang hindi masayang ang tubig,” ani Formilleza.
Samantala, sinabi ng OWD na pansamantala nitong itinigil ang water rationing sa mga malalayong barangay matapos mapabuti ang suplay ng tubig dulot ng mga pag-ulan sa nakalipas na mga araw. Gayunman, patuloy pa rin ang paghahanda ng ahensya upang matiyak ang sapat na suplay ng tubig sakaling lumala ang epekto ng El Niño sa mga susunod na buwan.
