Nasungkit ni Jasper Faeldonia ang kampeonato sa Sta. Fe Tablas Open Chess Tournament matapos magtala ng impresibong performance sa Open Division.
Nanatiling walang talo si National Master (NM) Faeldonia sa pitong rounds ng torneo, na may anim na panalo at isang tabla laban sa kanyang nakababatang kapatid na si Jerick Faeldonia. Pareho silang nakakuha ng 6.5 puntos ngunit pumangalawa si Arena International Master (AIM) Jerick Faeldonia base sa tiebreaks. Ito na ang ikalawang kampeonato ni NM Faeldonia ngayong buwan kasunod ng kanyang panalo sa Odiongan Fiesta Open Chess Tournament.
Sa tala ng Open Division, pumangatlo si Nephtali Bantang na may 5.5 puntos, kasunod sina Nomar Kiel Ramon at Andrew Gonzales. Kabilang din sa Top 10 sina Peter Cliffe Tumbagahon, Arc Hindap, Jay-ar Maquirang, Cyrus James Saya, at Nomie Fajarito Jr.
Sa mga special awards, kinilala si John Kenneth Lim bilang Top PWD at si Efren Arroyo bilang Top Senior.
Samantala, sa Kiddies Division, nangibabaw si Roda Gomez Ngo, isang 2026 Palarong Pambansa representative, matapos magtala ng perpektong iskor na 7/7. Sinundan siya nina Janes Falcutila na may 6 puntos at Vicente Luben na may 5 puntos.
Kabilang din sa Top 10 sa Kiddies Division sina Andres Maño Jr., Shayne Venice Tiaga, Mark Joe Mateo, Niel Rafael Fontabla, Ryel Min Joon Cano, Ralf Renz Cano, at Liza Solangon.
Isinagawa ang torneo noong Abril 18 at 19, 2026 sa Sta. Fe, Romblon sa tulong ng iba’t ibang sponsor at organisasyon.
“Maraming salamat sa ating mga sponsor: kay Bernie Festin, Pangulo ng SFCK (Sta. Fe Chess Knight); kay Noe Ramon, Bise-Presidente ng SFCK; sa ChessMatics Academy para sa mga tropeo at medalya; sa Faeldonia Chess Team Philippines; at sa Romblon Chess Federation na pinamumunuan ni Ret. DILG Regional Director at kasalukuyang Vice Mayor ng Banton, Romblon na si Hon. James F. Fadrilan,” pahayag ni Ernie Fetisan Faeldonia.
