Kasunod sa pagkakaaresto ng ilang pinaghihinalaang akyat-bahay kamakailan, nagbabala ang pulisya sa mga may balak pa gumawa ng kahalintulad na krimen dahil hindi sila titigilan ng mga kapulisan ng Romblon.
Pahayag ni Police Executive Master Sergeant Allan Fruelda ng Santa Fe Municipal Police Station sa ginanap na press conference nitong Biyernes, May 19, may binabantayan silang grupo ng mga magnanakaw na sumusugod tuwing gabi.
Aniya, sa kanilang bayan sa Santa Fe ay pinulong na nila ang mga barangay officials para ipaabot ang alam nilang impormasyon sa nasabing grupo.
Sinabi nito na patuloy ang ginagawa nilang monitoring para masigurong hindi na makakapambiktima ang mga kawatan.
“Babala ko po sa mga magnanakaw, ‘wag niyo na antayin na ako mismo ang makahuli sa inyo. Mag-iingat kayo sa mga pulis dahil hindi kami natutulog at lagi kami nagsasagawa ng patrolling,”ayon kay PEMS Fruelda.
Maalalang nitong nakalipas na mga araw ay may ilang nahuli ang kapulisan dahil rin sa kasong pagnanakaw sa ilang bahay sa Santa Fe at San Andres.
