Kinumpirma ng Department of Health (DOH) MIMAROPA na nasa 75.31% ng 744,408 projected household sa MIMAROPA Region ang mayroong nagagamit o naiinom na ligtas na tubig batay sa 2021 Household with Access to Basic Safety Water Supply report ng Field Health Service Information System (FHSIS) .
Sa virtual press conference noong Hunyo 27, 2022, sinabi ni Regional Sanitary Engineer Nillete Fidel, Engineer III ng Environmental and Occupational Health Cluster sa lalawigan ng Marinduque na umabot sa 97.72 % ng 56,464 projected housedold ang may akses sa ligtas na tubig habang sa Romblon ay 75.96 % lamang ng 71,033 projected household.
Sa Occidental Mindoro, 89.86 % sa 120,149 projected household at sa Oriental Mindoro ay umabot ng 102.57 % sa 206,567 projected household dahil sa aktwal na tala ay mas maraming residente ang nakakagamit ng ligtas na tubig kumpara sa projected number ng household batay sa listahan ng Philippine Statistics Authority.
Samantala, sa 71,006 projected household ng Puerto Princesa City, 90.40% ang nakakagamit ng malinis at ligtas na tubig habang sa 219,189 household sa Palawan ay 30.77 percent lang. Nilinaw naman niya na marami pa ang LGU sa Palawan na patuloy pang nagsusumite ng mga datos sa (FHSIS).
Ito aniya ang kabuuang bilang ng mga pamilya na mayroong akses sa iba't-ibang klase ng water supply system mula Level I kung saan sa bahaging ito ang mga pamilya ay kumukuha ng tubig mula lamang sa isang protektadong balon tulad ng poso habang sa Level II Water Supply System ay mayroong water source, water reservoir at distribution network subalit kailangang pumila ang mga tao para makakuha ng tubig at ang Level III Water Supply System ay ang pagkakaroon ng tubig ng mga pamilya direkta sa kanilang mga bahay o may koneksyon sa mga water district.
Ipinaliwanag niya rin na malalaman na ligtas ang inuming tubig kapag ito ay sinuri ng DOH Accredited Laboratory; sa MIMAROPA Region ay mayroon lamang isa at ito ay nasa Puerto Princesa City. Marami rin aniyang polisiya ang pamahalaan sa pagkakaroon ng ligtas na inuming tubig at isa dito ang kalalabas lang na Department of Health-Department of Interior and Local Government Unit (DOH-DILG) Joint Administrative Order No. 2022-0002 o ang panuntunan sa pagtatayo ng Local Drinking Water Quality Surveillance program sa pamamagitan ng pagbuo ng Local Drinking Water Quality Committee alinsunod sa P.D. 856 o Code on Sanitation of the Philippines. Ayon sa mga doktor, ang pagkakaroon ng ligtas na maiinom na tubig ay mahalaga para matiyak ang maayos na kalusugan ng mga mamamayan.(MCE/PIA MIMAROPA)
