Nakatanggap ng financial assistance mula sa Local Social Integration Program (LSIP) ng pamahalaang panlalawigan ng Palawan ang walong mga dating mga miyembro ng new peoples army o npa noong Pebrero 7,2022.
Sa inilabas na press statement ng Provincial Information Ofifice (PIO) ng Palawan, ang mga dating rebelde ay nabigyan ng tig-P25,000 na financial assistance bilang tulong sa kanilang pagbabagong buhay.
Ito ay ibinigay mismo nina Provincial Social Welfare Development Officer Abigail Ablaña, POP Deputy Director for Operations Colonel Gabriel C. Lopez (Ret) at PCol. Andrico Nangit ng Provincial Police Office.
Nakasaad rin dito na mula taong 2013 ay mayroon nang 178 na naitalang bilang ng mga sumukong rebelde na nabigyan ng tulong pinansyal. Bukod dito ay binibigyan din sila ng pagkakataon na sumailalim sa mga pagsasanay katuwang ang Technical Education and Skills Development Authority (TESDA) at makapagtrabaho sa iba't ibang ahensya ng gobyerno.
Ginawa ito ng pamahalaang panlalawigan bilang pagtugon sa inilabas na Executive Order No. 70 ni Pangulong Rodrigo Duterte noong taong 2018 kung saan binuo ang National Task Force To End Local Communist Armed Conflict o NTF-ELCAC para wakasan ang insurhensiya sa bansa.(MCE/PIA-MIMAROPA, PALAWAN)
