“Abangan nalang niya ang eleksyon, total malapit na rin naman.”
Yan ang pahayag ni incumbent Vice Governor Jose Riano sa ulat na lumabas sa isang pahayagan na di umano’y unti-unti ng nagpupulasan ang mga tagasuporta nito sa pagiging Gobernador at lumilipat na sa panig ng isa pang kandidato na si Robert Fabella.
Sa text message ni Riano sa Romblon News Network, sinabi nito na ‘fake news’ umano ang ulat at baka umano ay si Fabella na ang nawawalan na ng taga-suporta.
Ayon sa ilang source ng Romblon News Network, posible umanong pinagmulan ng ulat ang pangangampanya ng ilang personalidad at pinapalitaw ang tandem na Fabella at ni dating Congressman Eleandro Madrona, na lumalaban naman sa pagka-Congressman kalaban si incumbent Governor Eduardo Firmalo.
Itinanggi naman ni Fabella na suportado niya ang ganitong tandem at sinabing buo ang kanyang suporta kay Firmalo.
Samantala, ikinatuwa ni Fabella ang ulat na may mga nadadag sakanyang suporta mula sa kabila.
“Hindi ko pa nababasa yan, pero nakakatuwa naman sa kanilang suporta,” ayon sa maikling pahayag ni Fabella.
