Suportado ng kapulungan ng Iglesia Ni Cristo ang kandidatura nina Atty. Eleandro Madrona sa pagka-Congressman at dating Calatrava Mayor Robert Fabella sa pagka-Gobernador ng lalawigan, ayon sa isang mapagkakatiwalaang source ng Romblon News Network.
Hindi pa pormal na inaanunsyo ito ng simaban ngunit ayon sa ilang kandidatong nakuha, tinawagan na umano sila para pumunta sa District Office ng Iglesia Ni Cristo sa bayan ng Odiongan.
Sa isang text message ni Madrona sa Romblon News Network, nagpasalamat ito sa pamunuan ng Iglesia Ni Cristo dahil sa pagsuporta sakanya.
“Maligaya ako sa tiwala na ibinigay sa akin ng pamunuan ng Iglesia Ni Cristo at ako ay lubos na nagpapasalamat,” ayon kay Madrona.
Sinabi rin ni Madrona na kahit suportado siya ng INC, ‘magdodoble parin sila ng kayod' sa pangangampanya para masiguro ang panalo.
Samantala, sa maikling text message naman ni Fabella sa Romblon News Network, nagpasalamat lang ito sa suporta ng Iglesia sa kanyang kandidatura.
“Maraming Salamat sa suporta at tiwala,” ayon kay Fabella.
Si Madrona ay makakalaban ni incumbent Governor Eduardo Firmalo, habang si Fabella naman ay makakalaban ni incumbent Vice Governor Jose Riano.
Maliban kay Madrona at Fabella, nakakuha rin ng endorsement si incumbent SP Felix Ylagan na tumatakbo naman sa pagka-Bise Gobernador kalaban si incumbent SP Arman Gutierrez.
