Tumungo sa District 1 ang mga kumakandidato sa mataas na posisyon sa lalawigan ng Romblon para doon mangampanya, base sa patuloy na pagsunod ng Romblon News Network sa kanilang mga lakad, dalawang Linggo bago ang election.
Ang grupo ni incumbent Governor Eduardo Firmalo ay tumungo at nangampanya ng mahigit tatlong araw sa Sibuyan Island. Dumalo sila sa fiesta ng ilang barangay para magkorana sa isang pageant kasama sina former Calatrava Mayor Robert Fabella, at incumbent SP Felix Ylagan.
Nangampanya rin kasama nila sa Sibuyan sina Roberto Madera, Linda Mingoa, Alfeo Moreno, at dating Mayor Dindo Rios na pambato naman ng kanilang grupo sa Sangguniang Panlalawigan sa unang distrito.
Samantala, sa balwarte ng mga Madrona tumungo nitong Biyernes si dating Congressman, Atty. Eleandro Madrona kasama si incumbent Vice Governor Jose Riano.
Nag-ikot at nakipagkamay ang grupo ni Madrona sa mga taong nasa Poblacion, sa terminal ng jeep, hanggang sa palengke ng bayan ng San Agustin. Kasama nila ang mga kandidato ng NP-PDP Laban sa nasabing bayan at ilang taga-suporta.
Patuloy na babantayan ng Romblon News Network ang kampanya ng mga lokal na kandidato dito sa lalawigan ng Romblon.
