Kasunod ng paghikayat ng isang kandidato sa Commission on Elections at Department of Environment and Natural Resources (DENR) para tanggalin ang mga iligal na campaign materials na nakakabit sa mga puno at mga wala sa tamang sukat, nag-anunsyo ang DENR nitong Martes na magsasagawa sila ng ‘Oplan Baklas’ sa darating na Biyernes, April 26, sa bayan ng Odiongan.
Ayon kay Provincial Environment and Natural Resources Officer (PENRO) Maximo Landrito, nakipag-ugnayan agad siya sa COMELEC matapos lumabas ang ulat sa Romblon News Network kaugnay sa mga nagkalat na mga illegal campaign materials.
Sinabi ni Landrito na sisiguruhin ng kanyang mga tauhan na sasama sa ‘Oplan Baklas’ na tatanggalin nila ang lahat ng campaign materials na nakakabit sa puno ng kahoy dahil ipinagbabawal ito ng kanilang ahensya.
Nagsagawa na umano sila ng hiwalay na Oplan Baklas sa Isla ng Sibuyan nitong nakaraang Linggo para rin tanggalin ang mga posters na nasa mga puno ng kahoy.
Sa naunang pahayag, humiling si Landrito sa mga mga kandidato na igalang ang mga punong kahoy at ang Mother Earth sa pamamagitan ng hindi pagpapako ng mga campaign materials sa mga puno.
