Bago matapos ang taong 2019 ay magkakaroon na ng branch ang Bank of the Philippine Islands (BPI) sa bayan ng Odiongan sa Romblon, ito ay ayon sa source sa kompanya na nakausap ng Romblon News Network.
Plantsado na umano ang paglalagyan ng kanilang branch sa Sitio Cocoville sa Barangay Dapawan at nasa Odiongan na rin ang contractor nila mula Manila para mag ayos ng loob ng building.
Sa pahayag ni BPI President and Chief Executive Officer Cezar P. Consing noong nakaraang taon sa Businessworld, sinabi nito na magdadagdag sila ng 20 hanggang 30 na branches taon-taon para sa BPI at sa [BPI] Family [Savings] Bank.
Hindi ito kumpirmasyon sa ilalagay na branch ng BPI sa Odiongan ngunit nagpapahiwatig ito na patuloy ang kanilang ginagawang extension sa mga lugar at probinsya na patuloy ang pag-unlad.
Ikinatuwa naman ang nasabing balita ng ilang business owners na nakausap ng pahayagang ito, dahil malaking tulong umano ito lalo na sa publiko na pumipila ng napakahaba sa ilang congested na bangko sa bayan.
