Hinikayat ng pamahalaan ang mga Pilipino na mamuhunan sa Retail Treasury Bonds (RTBs) na maaaring simulan sa halagang ₱5,000, upang mapalago ang kanilang ipon habang nakatutulong sa pagpopondo ng mga programa at proyekto ng gobyerno.
Ayon kay Presidential Communications Office (PCO) Undersecretary at Palace Press Officer Claire Castro, ang RTBs ay inilaan para sa mga ordinaryong Pilipino, kabilang ang mga empleyado, maliliit na negosyante at mga pamilyang nais palaguin ang kanilang ipon.
“Ginawa po ito ng gobyerno para sa ordinaryong Pilipino, sa empleyado, sa maliliit na negosyante at sa pamilyang gustong palaguin ang kanilang pinaghirapang ipon,” ani Castro.
Ipinaliwanag ni Castro na ang pondong malilikom mula sa RTBs ay gagamitin upang suportahan ang mga programa ng pamahalaan sa iba’t ibang sektor tulad ng edukasyon, kalusugan, suporta sa negosyo, paglikha ng trabaho at iba pang inisyatiba para sa paglago ng ekonomiya.
Sa ilalim ng RTB 32, makatatanggap ang mga mamumuhunan ng fixed interest rate na 6.875 porsyento kada taon para sa 2.5 taong termino. Ayon sa pamahalaan, maaari itong maging alternatibo sa tradisyunal na paraan ng pag-iimpok dahil may nakatakdang kita mula sa interes.
Mas pinadali rin ang pagbili ng RTBs dahil maaaring mag-enroll ang mga mamumuhunan sa pamamagitan ng mga kalahok na selling agents, kabilang ang mobile banking applications at e-wallets.
“Madali lang po ang pag-enroll dito, pwede na po itong gawin sa ating mobile banking apps at e-wallets,” dagdag ni Castro.
Ang subscription period para sa RTB 32 ay mula September 29 hanggang October 7, 2026, habang itinakda naman ang settlement date sa October 12, 2026.
Maaaring bisitahin ang website ng Bureau of the Treasury para sa karagdagang impormasyon at listahan ng mga kalahok na selling agents.
