Suspendido ang trabaho sa mga tanggapan ng pamahalaan at kanselado ang klase sa lahat ng antas, pampubliko man o pribado, sa September 30 at October 1, 2026 sa Municipality of Santa Fe, Romblon.
Ito ay batay sa Executive Order No. 44, Series of 2026 na inilabas ni Municipal Mayor Asher C. Visca noong September 28, 2026.
Ayon sa kautusan, gaganapin sa September 30 ang culmination ng Municipal-Wide Civil Service Month Celebration, bilang bahagi ng nationwide observance ng Philippine Civil Service Month na naglalayong kilalanin ang dedikasyon at serbisyo ng mga kawani ng pamahalaan.
Samantala, gugunitain naman ng Santa Fe ang Founding Day nito sa October 1, isang mahalagang okasyon na bahagi ng kasaysayan, kultura at pag-unlad ng bayan.
Binigyang-diin sa executive order na ang dalawang pagdiriwang ay pagkakataon upang mapalakas ang civic pride, pakikilahok ng komunidad, pagkakaisa at pagkakapatiran ng mga residente ng Santa Fe.
Dahil dito, itinuring na nararapat na suspendihin ang trabaho sa mga tanggapan ng pamahalaan at kanselahin ang mga klase upang mabigyan ng pagkakataon ang mga empleyado ng munisipyo, guro, estudyante at residente na makilahok sa mga nakatakdang aktibidad.
Sa bisa ng Executive Order No. 44, walang pasok sa lahat ng antas ng paaralan, pampubliko at pribado, sa September 30 at October 1, habang suspendido rin ang trabaho sa mga tanggapan ng pamahalaan ng Municipality of Santa Fe sa parehong mga petsa.
Hinikayat naman ang buong komunidad na makiisa sa pagdiriwang ng Civil Service Month at Founding Day bilang pagkilala sa mga lingkod-bayan at pagpapahalaga sa kasaysayan at pagkakakilanlan ng Santa Fe.
Discussion about this post