Isinusulong ng Philippine Fisheries Development Authority (PFDA) at Lokal na Pamahalaan ng Calatrava ang pagpapaganda at pagpapaunlad ng Calatrava Municipal Fish Port sa pamamagitan ng ₱150-milyong Phase 1 project.
Naisagawa na ang bidding para sa unang phase ng proyekto na ipatutupad ng PFDA, isang attached agency ng Department of Agriculture, bilang bahagi ng pagpapalakas ng fisheries infrastructure sa bayan.
Kabilang sa post-harvest facilities na nakapaloob sa programa ang 15-metric-ton solar ice plant, na inaasahang magbibigay ng sapat na suplay ng yelo para sa mga mangingisda at fish vendors at makatutulong sa pagpapanatili ng kalidad at kasariwaan ng mga huli.
Batay sa pag-aaral at survey ng PFDA, tinatayang umaabot sa 35.27 metric tons kada araw ang fish catch sa Calatrava. Sa dami nito, nasa 1.57 metric tons ang para sa lokal na konsumo, habang humigit-kumulang 33.71 metric tons ang surplus na naibebenta sa mga karatig-bayan at naipapadala sa iba’t ibang lalawigan.
Dahil dito, mahalaga ang pagkakaroon ng mas maayos na fish port at post-harvest facilities upang mabawasan ang spoilage at mapabuti ang pag-iimbak at transportasyon ng mga produktong pangisdaan.
Inaasahang makatutulong din ang proyekto sa pagpapalakas ng kabuhayan ng mga fisherfolk at iba pang umaasa sa fisheries sector sa Calatrava.
Maalalang noong July ay pumirma sa kasunduan ang PFDA at ang LGU Calatrava para sa pagpapaganda ng nasabing fishport.
Nagpaabot naman ng pasasalamat si Mayor Robert Fabella kay Pangulong Ferdinand R. Marcos Jr., Agriculture Secretary Francisco “Kiko” Laurel Jr. at PFDA General Manager Atty. Glen Pangapalan sa suporta sa pagpapaunlad ng fish port.
Ayon kay Fabella, malaking tulong ang proyekto sa mga mangingisda at sa patuloy na pagpapalakas ng fisheries sector ng Calatrava.
Discussion about this post