Umabot sa ₱1.73 milyon ang halaga ng swine production support na ipinagkaloob ng Special Area for Agricultural Development (SAAD) Program Phase 2 sa 11 farmers’ associations sa Romblon at Palawan bilang karagdagang oportunidad sa kanilang kabuhayan.
Kabilang sa assistance ang 78 ulo ng baboy na binubuo ng 29 gilts at 49 weanlings na ipinamahagi sa 10 associations. Samantala, nakatakda namang makatanggap ngayong Agosto ng limang gilts ang Livestock and Poultry Raisers Association of Banton sa Banton, Romblon.
Kabilang sa mga benepisyaryo ang San Jose Swine Raisers Association sa San Jose at Santo Niño Farmers and Fisherfolks Association sa Santa Maria, Romblon, na dati nang nakatanggap ng swine production support mula sa SAAD.
Ang iba pang recipient associations ay pangunahing nakikibahagi sa corn, root crop, poultry at vegetable production, at gagamitin ang pag-aalaga ng baboy bilang karagdagang pinagkukunan ng kita.
Kabilang dito ang Camili Corn Growers Association at Bonlao Corn Growers Association sa Alcantara at Tabok Farmers Organization sa Concepcion, Romblon.
Mula naman sa Palawan ang CARDAMA Rural Improvement Club sa Balabac, Kasoy Growers and Processing Association sa Magsaysay, at Villa Fria Farmers Association, Diit Farmers Association at Villa Sol Farmers Association sa Agutaya.
Ayon kay Diit Farmers Association President John E. Pagdulangan, malaking tulong ang mga ipinagkaloob na baboy dahil nagsisilbi itong panimulang puhunan para sa karagdagang pagkakakitaan ng kanilang samahan.
“Maraming salamat po sa SAAD Program sa tulong na ibinigay sa amin na mga baboy. Malaking bagay po ito sa aming samahan dahil nagsisilbi itong panimula para magkaroon kami ng dagdag na pagkakakitaan,” ani Pagdulangan.
Samantala, sinabi ni Tabok Farmers Organization President Jinifer Fallarme na nakahanda silang magproseso ng karne kung sakaling lumampas sa lokal na pangangailangan ang kanilang produksyon.
“Kung dumating naman ang panahon na mag-oversupply ang aming lugar sa karneng baboy, kami ay handang mag-process [ng karne], magluto ng lechon at barbeque upang hindi kami dumating sa punto ng pagkalugi,” ani Fallarme.
Bukod sa mga baboy, nagkaloob din ang SAAD Program ng feeds upang makatulong na mabawasan ang production cost at masuportahan ang unang production cycle ng mga benepisyaryo.
Patuloy namang makikipag-ugnayan ang DA-SAAD MIMAROPA Marketing Assistance and Enterprise Development (MAED) Cluster sa mga lokal na pamahalaan upang matulungan ang mga beneficiary association sa market linkages, access sa mga lokal na puwesto sa pamilihan at promosyon ng kanilang mga produkto.
Layunin ng programa na mapalawak ang livelihood opportunities ng mga farmers’ association, madagdagan ang kanilang pinagkukunan ng kita at mapalakas ang kakayahan nilang ipagpatuloy at mapaunlad ang kanilang mga kabuhayan.
Discussion about this post