Ginagamit na ng lokal na pamahalaan ng Calatrava ang tinatawag na “Calatravanhon Card” bilang pangunahing sistema sa pagtukoy ng mga kwalipikadong benepisyaryo ng iba’t ibang programa ng LGU.
Ayon kay Mayor Robert “Bong” Fabella, ang Calatravanhon Card ay isang identification card na ipinagkakaloob sa mga residente, lalo na sa mga wala pang anumang valid ID.
Bukod sa pagiging ID, nagsisilbi rin itong bahagi ng database system ng pamahalaang bayan kung saan nakapaloob ang mahahalagang impormasyon tulad ng demographic details, pamilya, at household data ng bawat residente.
Ginamit na ang naturang card sa pamamahagi ng rice subsidy ng LGU, kung saan naging mas mabilis at sistematiko ang pagtukoy sa mga benepisyaryo at kanilang mga household members.
Ayon sa alkalde, nakatutulong ang sistemang ito upang maiwasan ang dobleng benepisyo at matiyak na ang tulong ng pamahalaan ay napupunta sa tamang mga residente.
Dagdag pa niya, inaasahang mas mapapadali ang implementasyon ng iba pang programa ng lokal na pamahalaan sa tulong ng Calatravanhon Card, dahil mas organisado na ang datos ng mga mamamayan sa bayan.
Patuloy na hinihikayat ng alkalde ang mga residente ng bayan nito na magpatala at kumuha ng Calatravanhon card para maisama sa database ng pamahalaan.
