Pinalalakas ng pamahalaang panlalawigan ng Romblon ang koordinasyon nito sa Boracay Island at lalawigan ng Aklan para sa planong tourism partnership ng Isla de Carabao, na tinaguriang “twin sister” ng sikat na destinasyon sa bansa.
Sa pagdiriwang ng kapistahan sa Carabao Island noong Marso 18, ibinahagi ni Governor Trina Firmalo-Fabic na patuloy ang kanilang pakikipag-ugnayan katuwang ang Provincial Tourism Office upang mapalakas ang tour operations at makapagbukas ng mas maraming oportunidad para sa mga residente ng isla.
Ayon naman kay Provincial Tourism Officer Kim Faderon nang makapanayam sa Kapihan sa PIA Romblon, nagsimula ang unang pag-uusap sa pagitan ng Romblon at Aklan noong Hulyo 2025, kung saan tinalakay ang seguridad ng mga turistang nagmumula sa Boracay na planong bumisita sa Carabao Island para sa day tours.
Matapos ang naturang pulong, muling inengganyo ang mga turista sa Boracay na subukan ang mga tour package papunta sa isla. Pinayagan na rin ang paglabas ng mga turista mula Boracay patungong Isla de Carabao nang hindi na kinakailangang dumaan sa Caticlan Jetty Port, na inaasahang magpapadali sa biyahe ng mga bisita.
Sa kasalukuyan, nasa paunang yugto pa lamang ang usapan, subalit inaasahang magpapatuloy ang serye ng mga pagpupulong upang maisakatuparan ang mas pinalakas na ugnayan sa turismo.
Bilang paghahanda, naglaan ang pamahalaang panlalawigan ng humigit-kumulang P10 milyong pondo para sa planong pagtatayo ng RORO port sa bayan ng San Jose. Layunin nitong mapabuti ang akses sa isla at mapadali ang pagpasok ng mga turista, bagama’t kinakailangan pa itong sumailalim sa pag-apruba ng Philippine Ports Authority.
Inaasahan ding makatutulong ang proyektong ito upang makahikayat ng mas maraming mamumuhunan sa isla, kasabay ng pagbaba ng presyo ng mga produkto dahil sa mas maayos na transportasyon ng mga suplay.
