Pormal nang ipinagkaloob ng lokal na pamahalaan ang isang bagong ambulansya sa Barangay Danao kasabay ng isinagawang unang Barangay Assembly noong Sabado, March 21.
Ang turnover ay pinangunahan ni Mayor Marvin Ramos kung saan inilagay sa pangangalaga ng barangay ang nasabing sasakyan na magsisilbi hindi lamang sa Danao kundi maging sa mga karatig na barangay ng Cantagda, Cambalo, at Marigondon.
Ayon sa alkalde, layunin ng pagkakaloob ng ambulansya na mapalakas ang kakayahan ng mga barangay sa mabilis na pagtugon sa mga emergency at sakuna, lalo na sa mga lugar na nangangailangan ng agarang serbisyong medikal.
Sa kanyang talumpati, binigyang-diin ni Ramos ang patuloy na suporta ng lokal na pamahalaan sa sektor ng kalusugan, kabilang ang pagbibigay-prayoridad sa mga programang direktang makikinabang ang mga residente sa mga komunidad.
Dagdag pa rito, inaasahan ding magbubukas sa mga susunod na buwan ang bagong klinika ng barangay, kasama ang suplay ng mga kagamitang medikal tulad ng nebulizer, oxygen tanks, at iba pang kinakailangang kagamitan upang mapalawak ang serbisyong pangkalusugan sa lugar.
Sinabi ng lokal na pamahalaan na bahagi ito ng patuloy na pagsisikap na mapalapit ang serbisyong medikal sa mga mamamayan at matiyak ang mas mabilis at epektibong pagtugon sa kanilang pangangailangan.
