Nilinaw ni Cajidiocan Mayor Marvin Ramos na naalis sa tamang konteksto ang social media post ni Ferdinand Merced, kilala rin bilang Philippine Looper, kaugnay ng isyu sa pag-akyat sa Mt. Guiting-Guiting sa Sibuyan Island.
Sa viral post, sinabi ni Merced na “kinakawawa ang locals” dahil sa hindi siya pinayagang umakyat ng bundok ng Protected Area Superintendent, matapos nitong ipaliwanag na hindi siya nakapag-comply sa mga requirements tulad ng medical certificate, proof of two major climbs, at iba pang patakaran.
Tinukoy din niya sa post ang epekto ng paghihigpit sa turismo at sa lokal na komunidad, at nanawagan kay Governor Trina Firmalo-Fabic na aksyunan ang sitwasyon. Mariin naman itong itinanggi ng PASU.
Ayon kay Mayor Ramos, ang pahayag ni Merced ay pag-uulit lamang ng hinaing ng ilang tour guide at porter na naapektuhan sa hanapbuhay dahil sa mga bagong patakaran.
Giit ng alkalde, hindi ang hindi pagpapahintulot na makaakyat ang isang indibidwal ang pangunahing isyu, kundi ang pagsusuri kung ang mga dagdag na rekisito ay nakabuti sa kaligtasan ng mga climbers o nakakaapekto sa bilang ng turistang nagpaplanong umakyat.
Sinabi rin niya na may mga tour guide at porter na nagpaabot ng mensahe sa mga lokal na opisyal hinggil sa mga kanseladong booking matapos ianunsyo ang muling pagbubukas ng bundok noong Pebrero 19. Batay sa kanilang ulat, ang mga bagong rekisito ang dahilan ng pagkansela ng bookings.
Dagdag ng alkalde, mahalagang pag-aralan ang isyu upang mapangalagaan ang interes ng turismo habang tinitiyak din ang kaligtasan ng mga umaakyat.
Nilinaw din ni Mayor Ramos na hindi nila sinusuportahan ang anumang panukalang ideklarang persona non grata si Merced sa Sibuyan. Ayon sa kanya, maayos at magalang umano itong nakipag-usap, at umaasa siyang magiging isa sa pinakamagandang alaala ni Merced ang kanyang pananatili sa isla.
