Arestado sa Cajidiocan, Romblon ang isang lalaking itinuturing na isa sa mga most wanted ng Philippine National Police–Anti-Kidnapping Group (PNP-AKG) kaugnay ng mga kasong kidnapping-for-ransom na kinasasangkutan ng mga dayuhan.
Kinilala ng pulisya ang suspek bilang si Lito Diego Presaldo, alyas “Litz,” na dinakip ng mga awtoridad sa Sitio Can Adlay, Barangay Gutivan, Cajidiocan noong Martes ng gabi.
Ayon sa PNP-AKG, si Presaldo ay kabilang sa Top 10 Most Wanted Persons ng kanilang hanay at sangkot umano sa mga insidente ng pagdukot kapalit ng ransom na ikinabiktima ng dalawang Chinese national at isang Taiwanese.
Isinagawa ang pag-aresto sa bisa ng ilang warrant of arrest na inilabas ng mga Regional Trial Court sa Pasay City at Parañaque noon pang 2022.
Ang mga kasong kinakaharap ng suspek ay may kaugnayan sa kidnapping-for-ransom at serious illegal detention, na pawang walang inirekomendang piyansa.
Sinabi ni AKG chief Police Brigadier General Glicerio Cansilao na ang pagkakaaresto kay Presaldo ay patunay ng patuloy na kampanya ng PNP laban sa kidnapping-for-ransom at iba pang mabibigat na krimen.
Kasalukuyang nasa kustodiya na ng pulisya ang suspek at inaasahang ihaharap sa korte para sa mga kasong isinampa laban sa kanya.
