Mahigit ₱10 milyong halaga ng mga proyekto sa ilalim ng DSWD KALAHI-CIDSS ang nakumpleto na at nagsisimula nang magdulot ng positibong pagbabago sa bayan ng Cajidiocan, Romblon.
Ayon sa Department of Social Welfare and Development, ang mga natapos na subproject ay nakatuon sa pagpapalakas ng access ng mga komunidad sa edukasyon, imprastraktura, at iba pang batayang serbisyo na mahalaga sa pang-araw-araw na pamumuhay ng mga residente.
Ipinagdiwang kamakailan ng mga benepisyaryong barangay ang pagkumpleto ng mga pasilidad na bunga ng sama-samang pagpaplano at pakikilahok ng komunidad.
Sa ilalim ng KALAHI-CIDSS, aktibong nakilahok ang mga residente sa pagtukoy ng kanilang mga pangangailangan, pagdidisenyo ng proyekto, at pagsubaybay sa implementasyon nito.
Binigyang-diin ng DSWD na ang mga community-driven development projects na ito ay patunay ng matibay na ugnayan ng ahensya, lokal na pamahalaan, at mamamayan, kung saan ang mga lokal na prayoridad ay nagiging konkretong programa at pasilidad na may pangmatagalang pakinabang.
