Nagpalabas ng paalala ang Lokal na Pamahalaan ng Calatrava kaugnay ng tumitinding banta ng African Swine Fever (ASF) sa lalawigan.
Sa anunsyo ng Municipal Government sa pangunguna ni Mayor Bong Fabella, mariing ipinagbabawal ang pagbebenta, pagbiyahe, at paglako ng karneng baboy na hindi dumaan sa tamang proseso ng pagkatay sa Municipal Slaughterhouse at hindi sumailalim sa wastong meat inspection.
Ayon sa LGU, layunin ng kautusan na matiyak na ang lahat ng karneng ibinibenta sa merkado ay ligtas kainin at sumusunod sa pambansa at lokal na pamantayan sa food safety, kasabay ng pagpigil sa pagkalat ng ASF sa bayan.
Kasabay nito, pinaalalahanan ang mga nag-aalaga at nagnenegosyo ng baboy na sundin ang mga umiiral na biosecurity measures, kabilang ang pagpapanatiling malinis ang mga kulungan, pag-iwas sa pagpasok o paglabas ng baboy nang walang permit, at agarang pagreport sa Municipal Agriculture Office sa anumang biglaang pagkakasakit o pagkamatay ng alagang hayop.
Babala ng LGU, ang sinumang lalabag ay mahaharap sa parusa, multa, at posibleng pagkumpiska ng mga produktong karne alinsunod sa municipal ordinances at national regulations sa meat inspection at ASF control.
Maalalang kumpirmadong may mahigit 100 baboy na ang namatay sa bayan ng Romblon, Romblon dahil sa nabanggit na sakit.
Hinimok naman ng lokal na pamahalaan ang publiko na magkaisa upang maprotektahan ang komunidad at matiyak ang kaligtasan at kalusugan ng mga residente ng Calatrava.
