Idineklara ni Department of Environment and Natural Resources (DENR) Secretary Raphael Lotilla na ang Verde Island Passage (VIP) ay mananatiling national passageway para lamang sa inter-island navigation at hindi ituturing na international waterway na bukas para sa mga banyagang fishing vessels.
Sa isang international forum noong Setyembre 15, na dinaluhan ng mga delegado mula sa iba’t ibang bansa, inilatag ni Lotilla ang mga hakbang upang mapangalagaan ang yamang-dagat at ekolohikal na integridad ng VIP. Giit niya, ito ay ituturing na mahalagang bahagi ng pambansang teritoryo na dapat protektahan laban sa labis na pangingisda at maling paggamit.
Ayon sa kalihim, ang VIP ay sumasalamin sa tatlong haligi ng sustainable development—environmental, economic, at social—na nangangailangan ng maingat na pamamahala batay sa siyentipikong kaalaman at ebidensya.
Nilinaw ni Lotilla na ang VIP ay ginagamit bilang pangunahing daanan ng mga sasakyang pandagat na nag-uugnay sa Luzon, Visayas, at Mindanao, at hindi ito bukas para sa malayang pagdaan ng mga dayuhang fishing vessels.
Itinakda rin ng DENR ang patakaran na lahat ng sasakyang dadaan sa VIP ay hindi maaaring huminto para sa pangingisda, upang maiwasan ang panganib sa yamang dagat at matiyak ang pagpapatuloy ng conservation efforts. Mariin ding tinutulan ni Lotilla ang posibleng pagdaan ng fishing vessels mula sa third countries na gumagamit ng karapatan sa international navigation bilang dahilan.
Sa forum, binigyang-diin ng DENR ang layunin nitong palawakin ang diskusyon mula sa agham tungo sa paggawa ng polisiya na sasaklaw sa usapin ng national at global security na may kaugnayan sa marine conservation at navigation protocols.
Ang Verde Island Passage, na naghihiwalay sa Batangas at Oriental Mindoro, ay kinikilala bilang isa sa pinakamayamang marine biodiversity areas sa buong mundo. Ito rin ang dahilan kung bakit tanyag na diving destinations ang Puerto Galera at Anilao, na malaki ang ambag sa turismo at pagpapakita ng likas na yaman ng Pilipinas.
Dumalo rin sa forum sina Presidential Sister Irene Marcos-Araneta at dating DENR Secretary Tony Yulo-Loizaga, na kapwa nagbigay ng paninindigan para sa pagpapanatili at pangangalaga ng Verde Island Passage.
