Naghain ng pormal na liham si Sangguniang Bayan (SB) Member Lyndon Molino ng Romblon sa pamunuan ng Simbahang Katolika kaugnay ng umano’y donasyong mula sa mga flood control contractors para sa simbahan ng Diocese of Romblon.
Nag-ugat ang usapin sa pahayag ni Congressman Eleandro Jesus Madrona na ang kanyang hiniling sa mag-asawang Pacifico at Cezarah Discaya ay donasyon para sa simbahan nang ito ay bumisita sa dalawa. Sa marker ng simbahan sa Barangay Bachawan, San Agustin, nakaukit ang pangalan ng mag-asawang Discaya at iba pang kontraktor bilang pagkilala sa kanilang suporta sa pagpapatayo ng gusali.
Ang liham ay ipinadala ni Molino kay Most Rev. Narciso Abellana, Obispo ng Romblon, at kopya rin kina Archbishop Charles John Brown, Apostolic Nuncio sa Pilipinas, at Most Rev. Gilbert Garcera, Presidente ng Catholic Bishops Conference of the Philippines.
Hiniling ni Molino sa simbahan na magbigay-linaw kung awtorisado nga ba ng Diocese si Congressman Madrona upang mangalap ng donasyon para sa simbahan, kung magkano ang halagang naibigay para sa proyekto, kung ang pondo ay naibigay nang direkta sa Diocese o dumaan sa iba, at kung may opisyal na resibo o katibayan ng pagtanggap mula sa mga nagbigay ng donasyon.
Binigyang-diin sa liham na mahalaga ang pagiging bukas at malinaw ng simbahan sa usaping ito upang mapanatili ang tiwala ng taumbayan at matukoy ang lawak ng pagkakasangkot ng Diocese sa iniimbestigahang isyu ng korapsyon.
Sa kasalukuyan, wala pang tugon ang Diocese of Romblon hinggil sa liham na ipinadala ni Molino.
