Inaprubahan ng House Budget Amendments Review Sub-Committee ng House Committee on Appropriations ang realignment ng ₱46 bilyon mula sa pondo ng Department of Public Works and Highways (DPWH) para sa mga flood control projects patungo sa dalawang pangunahing social programs ng pamahalaan para sa 2026.
Batay sa desisyon, ₱32.6 bilyon ang ililipat sa Assistance to Individuals in Crisis Situations (AICS) ng Department of Social Welfare and Development (DSWD), habang ₱14.82 bilyon naman ang idadagdag sa Tulong Panghanapbuhay sa Ating Disadvantaged/Displaced Workers (TUPAD) ng Department of Labor and Employment (DOLE).
Ang hakbang na ito ay kasunod ng pahayag ni Pangulong Ferdinand “Bongbong” Marcos Jr. na walang karagdagang pondo ang ilalaan sa mga flood control projects para sa 2026. Sa ilalim ng panukalang ₱6.7-trilyong pambansang budget, mahigit ₱250 bilyon ang orihinal na inilaan para sa flood control ng DPWH.
Ayon kay House Minority Leader Marcelino Libanan ng 4Ps party-list, mas makabubuting gamitin ang pondo para sa mga programang direktang nakatutulong sa mga mamamayan, partikular sa mga mahihirap at nawalan ng trabaho.
Ang AICS program ay nagbibigay ng pinansyal na ayuda para sa mga indibidwal na nasa emergency situations tulad ng pagkakasakit, aksidente, o kalamidad. Samantala, ang TUPAD ay nagbibigay ng emergency employment para sa mga nawalan ng hanapbuhay at nasa informal sector.
