Ibinaba ng Department of Public Works and Highways (DPWH) ngayong 2025 ang sunod-sunod na proyektong pang-imprastruktura sa Romblon na may kabuuang halaga na humigit-kumulang ₱5.4 bilyon, base sa listahang ipinaabot ng DPWH Region IV-B.
Kabilang sa mga pinatutukan ng ahensya ang malalaking flood control at coastal protection works, rehabilitasyon ng mga pangunahing kalsada, at konstruksyon ng mga multi-purpose buildings sa mga komunidad at paaralan.
Batay sa datus mula sa DPWH website, malinaw na nakatuon ang DPWH sa pagpapatayo ng flood control, river control at flood mitigation structures upang maprotektahan ang mga bayan laban sa pagbaha at pagguho ng lupa.
Kabilang dito ang mga proyektong tulad ng konstruksyon ng flood control structure sa Sitio Agcahico, Barangay Carmen Phase 2, San Agustin na nagkakahalaga ng ₱143.3 milyon at river control structure sa Mayor River Phase 2, Barangay Binonga-an, San Agustin na may parehong halaga. Mayroon ding rehabilitasyon at konstruksyon ng coastal protection tulad ng seawalls at revetments sa Odiongan at Magdiwang upang magsilbing panangga laban sa storm surge at pagguho ng baybayin.
Kasabay nito, itinataguyod din ng DPWH ang pagpapabuti ng road connectivity sa lalawigan. Kabilang sa mga malalaking road projects ang konstruksyon ng kalsadang mag-uugnay sa Tugdan Airport sa Odiongan at Alcantara–Odiongan road, na kapwa nagkakahalaga ng mahigit ₱142 milyon. Mayroon ding serye ng proyekto para sa pagpapalapad at pagpapaganda ng Tablas Circumferential Road, pati na rin ang pagtatayo ng mga bagong tulay sa mga estratehikong lokasyon.
Sa Odiongan, kabilang sa mga prayoridad ang seawall at flood control works sa Tabobo-an River na umaabot sa ₱141.8 milyon, at iba pang coastal protection projects na nagkakahalaga ng ₱132 milyon pataas. Sa Cajidiocan, tampok ang rehabilitasyon ng flood control structures sa Cambajao at Cambijang na kapwa lampas ₱142 milyon. Sa San Andres, San Fernando, at Alcantara naman, isinasagawa ang mga flood mitigation works at road construction projects na aabot sa daan-daang milyong piso.
Hindi rin nakaligtaan ang maliliit at katamtamang laki ng imprastruktura tulad ng mga multi-purpose buildings, covered courts, barangay halls, school facilities, at water supply systems na naipamahagi sa iba’t ibang bayan. May mga proyekto ring agad na natapos at nagagamit na ng komunidad, habang ilan ay nasa unang yugto pa lamang ng implementasyon.
Ayon sa DPWH, layunin ng mga proyektong ito na magbigay ng mas matibay na proteksyon laban sa kalamidad, pabilisin ang transportasyon ng tao at produkto, at maghatid ng serbisyong panlipunan sa pamamagitan ng maayos na pasilidad.
Sa kabuuan, ang ₱5.4 bilyong pondo ay nakalaan para sa 114 na proyekto sa Romblon ngayong 2025, na karamihan ay matatapos bago o sa kalagitnaan ng 2026.
