Sama-samang nagtulungan ang mga residente ng Barangay Lumbang Weste sa Cajidiocan, Romblon para sa magkaroon ng flood control project na layong solusyonan ang pagbaha tuwing malalakas ang ulan.
Ang proyekto, na nagkakahalaga ng ₱785,000, ay pinondohan ng Department of Social Welfare and Development (DSWD) Kalahi-CIDSS at ng lokal na pamahalaan ng Cajidiocan.
Batay sa ulat ng Cajidiocan Public Information Office, nasa 73% na ang completion rate ng proyekto na sinimulan noong Hulyo 21 at inaasahang matatapos bago pumasok ang Setyembre.
Bagama’t may mga manggagawang bayad sa pagpapatayo, nakilahok din ang mga residente bilang volunteers upang matiyak ang pagpapatupad ng proyekto—isang community counterpart requirement para makuha ang pondo mula sa Kalahi-CIDSS.
Ang Kalahi-CIDSS o Kapit-Bisig Laban sa Kahirapan – Comprehensive and Integrated Delivery of Social Services ay isang poverty alleviation program ng DSWD na layong palakasin ang partisipasyon ng mga komunidad sa pagpaplano at pagpapatupad ng mga proyektong makatutulong sa kanilang kaunlaran. Kabilang dito ang mga imprastrakturang pang-komunidad at disaster resiliency projects gaya ng flood control.
