Nanawagan si Baguio City Mayor Benjamin Magalong na isama rin sa imbestigasyon ang ilang kongresista kaugnay ng mga iregularidad sa mga flood control projects, kasunod ng utos ni Pangulong Ferdinand Marcos Jr. na silipin ang mga diumano'y palpak at “ghost” na proyekto ng Department of Public Works and Highways (DPWH).
Sa panayam kina Ted Failon at DJ Chacha nitong Martes, iginiit ni Magalong na ang mga kongresista mismo ang pumipili ng district engineers at regional directors sa kanilang mga lugar.
“Nagkakaroon ng conspiracy sa mga kickback, sa mga hatian, sa pagpili ng mga contractor — karamihan paborito nilang contractor, na politiko rin,” ayon sa alkalde.
Ipinahayag din niya ang pagkadismaya sa tila pagbubunyi ng mga mambabatas sa anunsyo ni Marcos sa kanyang SONA.
“Napaka-linaw ng palakpakan, sigawan, howling ng mga mambabatas. Sa dulo, sila rin naman ang sangkot. Parang inosente pa sila,” ani Magalong.
Nanawagan din siya na huwag limitahan ang imbestigasyon sa flood control projects lamang, dahil may iba pang proyektong kaduda-duda rin gaya ng solar lights at asphalt overlay, na aniya’y minadali ng ilang natalong opisyal para kumubra pa ng porsyento bago matapos ang termino.
“Hinabol pa nila ‘yung mga proyekto hanggang June 13 para sa kickback,” dagdag ni Magalong.
Tiniyak ni Magalong na babantayan niya ang mga susunod na hakbang ng gobyerno kaugnay ng utos ng Pangulo upang masigurong maayos itong maipatupad.
