Patuloy ang isinasagawang search and rescue operations ng Philippine Coast Guard (PCG) para sa dalawang nawawalang tripulante ng MV Hong Hai 16 na tumaob sa karagatang sakop ng bayan ng Rizal noong Abril 15, 2025.
Ayon kay PCG Occidental Mindoro Commander Keneth Bongabong, umakyat na sa siyam (9) ang bilang ng nasawi sa insidente matapos marekober ang dalawang bangkay noong Abril 20.
Ani Bongabong, isasailalim pa sa beripikasyon ng kani-kanilang mga pamilya ang pagkakakilanlan ng mga bangkay na nakuha.
Habang nagpapatuloy ang underwater search, katuwang ng PCG ang Department of Environment and Natural Resources (DENR) at ang lokal na pamahalaan sa pagsasagawa ng seaboard patrol at oil spill monitoring sa paligid ng lumubog na barko at baybayin ng Rizal.
“So far, wala naman tayong nakita na any signs of oil spill sa area,” paniniguro ni Bongabong.
Samantala, sinabi ni Rizal Municipal Information Officer Jack Motril na wala ring naiulat na nasirang coral reefs bunsod ng insidente. Pinuri rin ng LGU ang mabilis na aksyon ng PCG sa pangyayari.
“In behalf of the whole LGU and the municipality of Rizal, we would like to extend our deepest gratitude sa buong Philippine Coast Guard… sila talaga ang nanguna sa ating incident command,” ani Motril.
Ang MV Hong Hai 16, isang sand carrier vessel, ay lumubog noong Abril 15 sa bahagi ng Barangay Malawaan, Rizal. Sakay nito ang 25 tripulante — 13 Pilipino at 12 Chinese nationals.
Kaugnay nito, noong Abril 21, 2025, naglabas ng cease and desist order ang Pamahalaang Panlalawigan ng Occidental Mindoro laban sa Bluemax Tradelink, Inc., ang kumpanyang nagsasagawa ng dredging activity sa bayan ng Rizal. (with reports from Dianne Francis Sy-Gorembalem of PIA MIMAROPA)
