Dalawang magkapatid ang nasawi matapos malunod habang isinasagip ang nalulunod rin nilang mga apo sa Sitio Lantangan, Brgy. Balogo, Calatrava nitong hapon ng Huwebes.
Ang magkapatid na nasawi ay kinilalang sina Ronnie Fajutag Fajel, 60, at Nora Fajel Gala, 50, pawang mga residente ng Barangay Malaria, Caloocan City.
Ayon sa ulat ng Calatrava Municipal Police Station, nagpasya ang grupo na maligo kasama ang kanilang mga apo na edad 6 at 10 sa dalampasigan ng Sitio Lantangan.
Ngunit pagdating ng alas-4:30 ng hapon ay napansin nilang tinatangay ng alon ang dalawang bata palayo sa kanila dahilan upang agad na subukang i-rescue ng magkapatid ang dalawa.
Sa kasamaangpalad, ang dalawa ay tinangay rin ng malalakas na alon dahilan upang sila ay malunod din. Nailigtas naman ng mga nagmagandang loob na mga residente ang dalawang bata.
Sinubukang isugod si Gala sa San Andres Municipal Hospital ngunit idineklara itong dead on arrival habang si Fajel naman ay nakita kalaunan ang katawan sa ilalim ng dagat.