Inaresto ng mga tauhan ng Boracay police ang alkalde ng San Jose, Romblon na si Mayor Egdon Sombilon matapos mapag-alamang may dalang baril na expired na pala ang lisensya.
Ayon sa report ng pulisya, ang alkalde ay pumasok sa isang bar para sana makipagpulong sa ilang negosyante at bilang patakaran, iniwan nito sa gwardya ng bar ang kanyang dalang baril noong Sabado ng gabi.
Nang inspeksyunin ng pulis, napag-alamang expired na pala ang lisensya nito.
Hindi naman pumalag ang alkalde at kusang sumama sa police station kung saan siya nanatili hanggang makapag-piyansa nitong Lunes, August 29.
Inamin naman umano ng alkalde na expired nga ang lisensya ng dala nitong baril.
Sinamapahan ang alkalde ng kasong paglabag sa Republic Act 10591 o ang Comprehensive Firearms and Ammunition Regulation Act.
