Kakulangan ng lokal na oportunidad sa trabaho at pag-alis ng mga propesyonal upang maghanapbuhay sa ibang lugar ang ilan sa mga hamong kinakaharap ng lalawigan ng Romblon sa kabila ng paglago ng ekonomiya nito ng 3.3 percent noong 2025.
Ito ang inilahad ni Executive Assistant to the Governor Dr. Arnulfo De Luna sa Provincial Product Accounts (PPA) Dissemination Forum ng Philippine Statistics Authority (PSA) Romblon na ginanap sa FAAS Loft Hotel sa San Agustin, Romblon nitong October 13, 2026.
Ayon kay De Luna, kabilang sa mga pangunahing hamon ang kakulangan ng mga bakanteng posisyon para sa mga kwalipikadong manggagawa, na nagiging dahilan upang lumipat sa ibang lalawigan o rehiyon ang mga propesyonal na nagmula sa Romblon.
Binigyang-diin niya ang sitwasyon sa sektor ng edukasyon, kung saan mahigit 100 ang pumapasa sa Licensure Examination for Teachers (LET) mula sa lalawigan kada taon, ngunit dalawa lamang ang bakanteng posisyon sa DepEd Division of Romblon.
Dahil sa limitadong oportunidad at sa average age na 35 taong gulang ng mga guro sa lalawigan, napipilitan umano ang ilan sa mga lisensyadong guro na maghanap ng trabaho sa CALABARZON, Mindoro at iba pang rehiyon.
Bagama't nagiging mapagkukunan ang Romblon ng mga bihasang manggagawa at propesyonal, kabilang ang mga sumailalim sa pagsasanay ng Technical Education and Skills Development Authority (TESDA), sinabi ni De Luna na ang naibabalik nilang pakinabang sa lalawigan ay kadalasang nasa anyo na lamang ng remittance sa kanilang mga pamilya sa halip na direktang paggamit ng kanilang kakayahan sa lokal na ekonomiya.
Bukod sa trabaho, tinalakay rin sa forum ang mga hamon sa agrikultura at pangisdaan. Kabilang dito ang pagkasira ng mga mangrove area at kakulangan ng mga proyektong pangisdaan gaya ng payao, na iniuugnay sa pagbaba ng huli ng mga mangingisda at kakulangan ng malalaking isda sa karagatan ng lalawigan.
Nabanggit din ang pagbaba ng produksyon ng niyog dahil sa kakulangan ng suporta sa industriya. Kaugnay nito, nakikipag-ugnayan ang pamahalaang panlalawigan sa Philippine Coconut Authority (PCA) para sa pamamahagi ng libreng dwarf coconut seed nuts.
Upang matugunan ang mga hamong ito, sinabi ni De Luna na nagsisikap ang pamahalaang panlalawigan na maibalik sa mamamayan ang hanggang 80 porsiyento ng pondo nito sa pamamagitan ng mga programang nakatuon sa imprastraktura, pangingisda at agrikultura.
Kabilang din sa mga tinututukan ang pagpapalawak ng concrete runway ng paliparan sa Tablas upang makahikayat ng mas maraming pamumuhunan at turista sa lalawigan.
Hinimok ni De Luna ang mga lokal na pamahalaan at mamamayan na makipagtulungan upang matiyak na ang mga gastusing pampubliko ay magdudulot ng makabuluhang epekto sa mga problemang natukoy sa datos ng PSA.
