Binuksan ng Romblon State University (RSU) ang pagdiriwang sa ika-17 anibersaryo nito sa pamamagitan ng iba't ibang aktibidad na bahagi ng University Week 2026 na nagsimula nitong October 12.
Pinangunahan ng mga opisyal, kawani at estudyante ang University Parade bilang bahagi ng pagbubukas ng pagdiriwang, na tampok din ang iba pang programa.
Kasabay nito, binuksan din ang Bringing Inclusive Development through Action (BIDA) Sports Festival, kung saan nagtipon ang mga student-athlete mula sa iba’t ibang kolehiyo upang ipakita ang kanilang kakayahan at makipagtagisan sa larangan ng palakasan, na may pagpapahalaga sa teamwork at sportsmanship.
Bilang bahagi rin ng pagdiriwang, binuksan ni RSU President Merian Mani ang pop-up store na nagtatampok ng mga produktong may tatak na “Taga-Isla,” na naglalayong itaguyod ang lokal na pagkakakilanlan at pagmamalaki sa kultura ng Romblon.
Ayon kay Dr. Gianinna Elaine M. Labicane, vice president for Student Affairs and Services ng RSU, hindi lamang simpleng tatak ang “Taga-Isla” kundi simbolo rin ng pagmamalaki sa kultura at pagkakakilanlan ng mga Romblomanon.
Kabilang sa mga produktong maaaring mabili ng publiko ang mga damit, notebook at iba pang merchandise na sumasalamin sa identidad ng lalawigan.
Itinampok din sa University Food Expo ang iba’t ibang katutubong pagkain at lokal na putahe mula sa mga bayan ng Romblon. Ayon kay Labicane, layunin ng aktibidad na maipakita ang mga food innovation na nilikha ng mga estudyante at faculty mula sa iba’t ibang campus ng unibersidad.
Sa pamamagitan ng mga aktibidad, naipamalas ang kultura, lokal na produkto at kakayahan ng mga mamamayan ng Romblon, kasabay ng pagdiriwang ng mahalagang yugto sa kasaysayan ng unibersidad.
Sa nasabing linggo ay inaasahan ding ilulunsad ang Strategic Development Plan (SDP) 2026–2035 bilang gabay sa direksiyon ng unibersidad sa susunod na dekada.
Sa pamamagitan ng temang PAGTANAW 2035, binibigyang-pugay ng RSU ang mga naging bahagi ng pag-unlad nito habang inilalatag ang mga plano at direksiyon para sa susunod na sampung taon.
