Tatlong indibiduwal ang matagumpay na nasagip ng mga tauhan ng Philippine Coast Guard (PCG) matapos silang ma-stranded nang biglang tumaas ang antas ng tubig at lumakas ang agos ng isang ilog sa bayan ng Cajidiocan, Romblon nitong Sabado.
Ayon sa PCG, ang insidente ay naganap sa ilalim ng Cambajao Bridge sa Barangay Cambajao nitong Sabado, kasunod ng tuluy-tuloy na pag-ulan sa lugar.
Nabatid na nakatanggap ng ulat ang PCG hinggil sa biglaang pagtaas ng tubig sa ilog na nagresulta sa pagkaka-trap ng tatlong indibiduwal sa nasabing bahagi ng tulay. Dahil dito, agad na nagpadala ng rescue team ang PCG upang magsagawa ng agarang pagsagip.
Mabilis namang naisagawa ang rescue operation at ligtas na nailikas ang tatlong biktima. Tiniyak ng PCG na ang mga ito ay nasa maayos nang kalagayan at agad na naisama sa kani-kanilang pamilya.
