Isinagawa ang Provincial Elderly Filipino Week 2026 ngayong October 2 sa bayan ng Looc, Romblon bilang bahagi ng paggunita at pagkilala sa sektor ng mga nakatatanda.
Pinangunahan ang aktibidad ng Provincial Social Welfare and Development Office (PSWDO) sa pakikipagtulungan ng National Commission of Senior Citizens (NCSC).
Dinaluhan ang aktibidad ng mga opisyal ng probinsya at iba't ibang lokal na pamahalaan maging mga delegado ng senior citizens mula sa iba’t ibang bayan sa buong lalawigan.
Bilang host municipality, tinanggap ng bayan ng Looc ang mga kalahok sa pamamagitan ng welcome message ni Mayor Lisette Arboleda, kung saan binigyang-diin niya ang kahalagahan ng pagkilala sa mga karapatan at kapakanan ng mga senior citizen.
“Dapat po unequivocal… we treat our senior citizens as right holders, and not mere recipients of charity or basic care. Ibig sabihin, ’yung mga benepisyo at tamang pagtrato sa inyo ay karapatan po ninyo bilang senior citizens, at hindi lang po ’yan ibinibigay bilang charity ng gobyerno,” pahayag ni Mayor Arboleda.
Ipinakilala rin sa programa ang ilang inisyatibo sa Looc katuwang si Congressman Eleandro Jesus “Budoy” Madrona, kabilang ang libreng laboratory check-ups, probisyon ng monthly maintenance medicines, at livelihood training sa ilalim ng Tulong Panghanapbuhay sa Ating Disadvantaged/Displaced Workers ng Department of Labor and Employment at Department of Social Welfare and Development bilang mga oportunidad para sa mga senior citizen.
Pinasalamatan naman ni Mayor Arboleda ang mga gurong pampubliko, magsasaka, mangingisda at iba pang manggagawa na kabilang na ngayon sa sektor ng senior citizens dahil sa kanilang naging ambag sa lipunan.
“You have paved the way for this generation. Tandaan niyo po, ang pagrespeto at pagmamahal po namin sa senior citizens ay mananatili,” ani Arboleda.
Bahagi ang aktibidad ng paggunita sa Elderly Filipino Week, na naglalayong bigyang-pansin ang mga programa at serbisyo para sa mga nakatatanda sa lalawigan.
