Kinikilala ang tradisyunal na kasanayan ng mga taga-Corcuera, Romblon sa paghahabi ng pandan mat matapos maisama ang naturang lokal na likha sa mga tampok na produkto sa “Likha 5: Likha Ko, Lahi Ko”, isang pambansang eksibisyon para sa mga likhang-kamay ng mga Pilipino.
Bahagi ang pandan mat weaving ng Corcuera sa mga bagong artisan craft na itinampok ngayong taon sa Likha, kasama ang iba pang tradisyunal na produkto mula sa iba’t ibang panig ng bansa tulad ng mga hinabing tela, basket, maskara at burda. Ipinadala ng Romblon si Rick Fruelda, isang weaver mula sa bayna ng Corcuera.
Ang Likha 5 ay nagtipon ng mahigit 100 artisan mula sa iba’t ibang rehiyon upang maipakita ang yaman ng kulturang Pilipino at ang mga kasanayang naipapasa sa bawat henerasyon.
Sa pamamagitan ng pandan mat weaving, naipapakita ng mga taga-Corcuera ang kahalagahan ng lokal na materyales at tradisyunal na pamamaraan ng paghahabi na bahagi ng kanilang kultura at kabuhayan.
Bukod sa pagpapakita ng mga produkto, layunin ng Likha na bigyang-puwang ang mga artisan upang maibahagi ang kanilang kaalaman, makilala ang proseso sa likod ng kanilang mga likha, at makahanap ng mas malawak na merkado para sa kanilang mga produkto.
Itinatampok din sa naturang programa ang mga live demonstration, workshop at talakayan upang mas maunawaan ng publiko ang mga kasanayang bumubuo sa mga tradisyunal na likhang Pilipino.
Sa pagsasama ng pandan mat weaving ng Corcuera sa pambansang eksibisyon, muling naipapakita ang natatanging talento ng mga lokal na manghahabi ng Romblon at ang patuloy na halaga ng pagpapanatili ng mga tradisyunal na sining at gawang-kamay.
