Inaprubahan na ng Sangguniang Bayan ng Odiongan ang ordinansang nag-iinstitusyon sa Educational Incentives program para sa mga graduating Senior High School at college students sa bayan.
Ang panukala, na pormal na tinawag na “Educational Incentives Ordinance,” ay inakda at pangunahing isinulong nina Committee on Education Chairperson Hon. Kaila Alvar Yap at Hon. SK Kyert Gil Gado Fabella.
Ayon sa mga may-akda, layunin ng programa na magbigay ng suporta at insentibo sa mga kabataang mag-aaral ng Odiongan bilang pagkilala sa kanilang pagsisikap sa pagtatapos.
“Malaking tulong ang inisyatibong ito upang kahit papaano ay maibsan ang mga gastusin ng ating mga estudyante at ng kanilang mga pamilya sa panahon ng kanilang pagtatapos. Patuloy nating isusulong ang mga programang magbibigay-daan sa mas magandang kinabukasan ng ating kabataan,” pahayag ni Yap.
Sinuportahan din ng lokal na pamahalaan sa pangunguna ni Mayor Roger Q. Fodra, Jr. ang ordinansa, kasama ang suporta ni Governor Trina Firmalo-Fabic na unang nagpahayag ng suporta sa inisyatibo noong 2024.
“Ang edukasyon ang pinakamagandang pamana na maibibigay natin sa ating mga kabataan. Kaisa tayo sa pagtataguyod ng programang ito upang mas maramdaman nila ang suporta ng pamahalaan sa bawat hakbang ng kanilang tagumpay,” ayon kay Fodra.
Batay sa mga probisyon ng ordinansa, kwalipikado sa insentibo ang mga graduating student na nag-aaral sa mga lokal na paaralan at unibersidad at residente at rehistradong botante ng Odiongan.
Makakatanggap ang bawat kwalipikadong graduating college student ng ₱2,500, habang ₱1,200 naman ang matatanggap ng graduating Senior High School student. Tinatayang aabot sa ₱3 milyon ang kabuuang pondong ilalaan para sa programa.
Karaniwang isasagawa ang pamamahagi ng insentibo mula March hanggang April bago ang graduation. Magsisimula naman nang mas maaga ang validation at pagproseso ng mga kinakailangang dokumento, kabilang ang proof of enrollment at certificate of residency, na tinatayang apat na buwan bago ang graduation.
Kasalukuyan nang kumukuha ng datos at naghahanda ang lokal na pamahalaan para sa pagtukoy sa bilang ng mga kwalipikadong benepisyaryo para sa susunod na taon.
