Hindi na umano maghahain ng reklamo laban sa driver ang mga sakay ng pampasaherong jeep na tumagilid sa Sitio Bagacuta, Barangay Paroyhog, Santa Maria, Romblon noong September 30.
Ayon kay Major Francis Rey Manito, hepe ng Santa Maria Municipal Police Station, nagpahayag na ang mga biktima na hindi sila magrereklamo laban sa driver dahil itinuturing nilang aksidente ang nangyari.
Ibinahagi rin ng hepe nakauwi na ang karamihan sa mga pasaherong isinugod sa ospital matapos magtamo ng mga galos at sugat sa aksidente.
Labing-isa sa 13 na sakay ng jeep ang dinala sa Don Modesto Formilleza Sr. Memorial Hospital matapos ang insidente. Wala naman umanong nagtamo ng kritikal na kondisyon sa mga isinugod sa ospital.
Ayon kay Manito, nangako rin umano ang may-ari ng jeep na sasagutin ang pagpapagamot ng mga pasaherong nasugatan sa aksidente.
Batay sa ulat ng pulisya, tinatahak ng jeep ang pababang bahagi ng National Road nang mapansin umano ng driver na hindi gumagana ang preno ng sasakyan.
Dahil dito, minaniobra umano ng driver ang jeep patungo sa kaliwang bahagi ng kalsada at sinadyang itama sa gilid ng burol upang mapahinto ang sasakyan at maiwasang tuluyang bumaba sa matarik na bahagi ng kalsada.
Gayunman, tumagilid ang jeep at bumagsak sa kanang bahagi nito.
