Dalawampung grupo ng kababaihan sa San Jose ang nakatanggap kamakailan ng mga kagamitan sa paghahalaman at vegetable seeds sa ilalim ng Gulayan sa Kababaihan Program ng lokal na pamahalaan, bilang bahagi ng Gender and Development (GAD) Program na naglalayong palakasin ang kakayahan ng kababaihan sa agrikultura.
Bawat grupo na binubuo ng tig-limang miyembro ay nakinabang sa programa na naglalayong magbigay ng karagdagang kaalaman at kagamitan para sa pagtatanim at produksyon ng gulay.
Bilang bahagi ng aktibidad, isinagawa ang capacity-building training na tumalakay sa papel ng kababaihan sa agrikultura, urban gardening at vegetable production.
Matapos ang pagsasanay, ipinamahagi sa mga benepisyaryo ang iba’t ibang kagamitan, kabilang ang rake, hand trowel, pitchfork, sprinkler, garden hoe at spade, na may tig-50 piraso bawat uri. Naglaan din ng watering cans at iba pang kagamitan para sa kanilang gardening activities.
Isinagawa ang programa sa ilalim ng pamumuno ni Mayor Ronnie Samson, na kinatawan ni SB Member Ally Aron, kasama si Vice Mayor Argel Fortunato.
Sa pamamagitan ng Gulayan sa Kababaihan Program, layon ng lokal na pamahalaan na higit pang mapaunlad ang kaalaman at kakayahan ng mga kababaihan sa paghahalaman at vegetable production, na maaari nilang magamit sa kanilang mga tahanan at komunidad.
