Ipinatupad ang zero-balance billing sa Romblon Provincial Hospital at Romblon District Hospital bilang bahagi ng mga serbisyong hatid ng pamahalaan sa ilalim ng Handog ng Pangulo 2026 ng administrasyon ni Pangulong Ferdinand R. Marcos Jr.
Ayon kay Romblon Governor Trina Firmalo-Fabic, saklaw ng programa ang mga pasyente sa dalawang ospital mula 12:01 a.m. hanggang 11:59 p.m. sa araw ng isinagawang Handog ng Pangulo, kung saan sisingilin sa Office of the President ang mga gastusin.
“No balance billing po tayo simula kaninang 12:01 a.m. hanggang mamayang 11:59 p.m. Lahat po ng nasa ospital natin ngayon ay libre, libre naman po pero mas libre pa ngayong araw kasi charge sa MAIFIP (Medical Assistance to Indigent and Financially Incapacitated Patients) fund ng Office of the President,” ani Firmalo-Fabic.
Kabilang sa saklaw ng zero-balance billing ang mga laboratory services at iba pang hospital services, kaya hindi na kailangang bayaran ng mga pasyente ang kaukulang singil para sa mga serbisyong kanilang matatanggap sa loob ng itinakdang panahon.
“Pati ang mga laboratoryo at ibang mga services ay libre po lahat,” dagdag ng gobernador.
Nagpasalamat naman si Firmalo-Fabic kay Pangulong Marcos sa naturang inisyatiba na bahagi ng nationwide Handog ng Pangulo, na naglalayong mailapit ang mga serbisyo ng pamahalaan sa mga komunidad bilang bahagi ng pagdiriwang ng kaarawan ng Pangulo.
Sinabi ng gobernador na nakatulong ang programa upang higit na maging accessible sa mga Romblomanon ang mahahalagang serbisyong pangkalusugan sa dalawang ospital.
