Nagbabala ang San Agustin Municipal Police Station (MPS) sa mga residente laban sa isang indibidwal na nagpapakilalang miyembro ng New People’s Army (NPA) at nanghihingi ng pera matapos umano itong magpadala ng mga text message at tumawag sa ilang indibidwal sa bayan.
Ayon sa San Agustin MPS, may mga residente na nakatanggap ng mga mensahe at tawag mula sa taong nagpapakilalang miyembro ng NPA at humihingi ng pera. Gayunman, nilinaw na wala pang naiulat na aktuwal na nabiktima o nakapagbigay ng pera kaugnay ng insidente.
Dahil dito, pinaalalahanan ng pulisya ang publiko na huwag basta magbigay ng pera o personal na impormasyon sa mga hindi kilalang tao, lalo na kung gumagamit ng pagbabanta o nagpapakilalang miyembro ng isang armadong grupo upang makahingi ng pera.
Pinayuhan din ang mga nakatanggap ng kahina-hinalang tawag o mensahe na huwag makipagtalo o makipagkomprontasyon sa tumatawag o nagmemensahe.
Sa halip, hinihikayat silang i-save ang mga text message, larawan, numero ng telepono, social media account at iba pang ebidensya na maaaring makatulong sa pagtukoy at beripikasyon sa pagkakakilanlan ng taong nasa likod ng mga tawag at mensahe.
Maaari ring agad na i-report sa barangay o pinakamalapit na himpilan ng pulisya ang anumang kahina-hinalang pakikipag-ugnayan upang maayos na ma-verify at maaksyunan ng mga awtoridad.
Hinimok naman ng San Agustin MPS ang publiko na manatiling mapagmatyag at huwag magpakalat ng hindi pa kumpirmadong impormasyon, kasabay ng paalala na unahin ang kaligtasan at i-report agad sa mga awtoridad ang anumang kahina-hinalang insidente.
