Sugatan ang isang 21-anyos na mangingisda matapos umanong barilin ng isang 49-anyos na lalaki kasunod ng mainitang pagtatalo sa Sitio Miason, Barangay Busay, San Jose, Romblon bandang 8:20 ng gabi noong September 22, 2026.
Batay sa paunang imbestigasyon ng San Jose Municipal Police Station (MPS), dumalo ang biktima, residente ng Sitio Sugod, Barangay Pinamihagan, sa isang birthday celebration kung saan umano sila nag-iinuman ng 49-anyos na suspek, isang may-asawa at Chief Barangay Tanod na residente ng Barangay Busay.
Ayon sa pulisya, natutulog umano ang suspek habang naghahanda nang umalis ang biktima at mga kasama nito. Nang magising, hinarap umano ng suspek ang grupo na nauwi sa mainitang pagtatalo.
Sa gitna ng komprontasyon, umano’y sinampal ng suspek sa ulo at hinawakan ang biktima, dahilan upang suntukin umano ito ng biktima.
Ayon sa paunang ulat, bumunot umano ng baril ang suspek at nagpaputok, na tumama sa kanang binti ng biktima.
Agad namang nabawi mula sa suspek ang umano’y ginamit na baril matapos itong maagaw. Kapwa dinala sa San Jose District Hospital ang biktima at suspek para sa kaukulang atensyong medikal.
Narekober sa pinangyarihan ang isang caliber .45 Armscor pistol na kulay silver, isang magazine at isang basyo ng caliber .45. Isinailalim ang mga ito sa kaukulang dokumentasyon, pagsusuri at disposisyon.
Patuloy ang imbestigasyon ng San Jose MPS upang matukoy ang buong pangyayari at mga posibleng kasong ihahain kaugnay ng insidente.
