Hindi nakalahok sa Division Schools Press Conference (DSPC) na bahagi ng isinasagawang Romblon Academic Contest for Excellence (RACE) sa Looc ang ilang delegado mula sa Corcuera District, kabilang ang Radio Broadcasting team ng Mabini National High School, dahil sa masamang panahon at kondisyon ng dagat.
Naglabas ng paglilinaw ang Department of Education (DepEd) Division of Romblon) matapos ipahayag ng ilang coaching staff at mag-aaral ang kanilang pagkadismaya sa hindi pagkakalahok sa kompetisyon, kasunod ng matagal na pagsasanay at paghahanda ng mga delegado.
Sa panayam kay Lucin Fruelda, Education Program Supervisor (EPS) for Journalism ng DepEd Division of Romblon, ipinaliwanag nito ang naging sitwasyon at mga alituntuning ipinatupad para sa kompetisyon.
Ayon kay Fruelda, ang Corcuera District Office mismo ang nagdesisyong kanselahin ang pagbiyahe ng mga delegado bago pa man sila makaalis noong Linggo dahil sa banta ng masamang panahon at malalakas na alon dulot ng Habagat.
Binigyang-diin niyang isinasaalang-alang lamang ng pamunuan ang kaligtasan ng mga mag-aaral at guro, lalo na't maaaring maging delikado ang pagkuha ng maliliit na bangka kapag malakas ang alon sa dagat.
Nilinaw din ng opisyal ang usapin tungkol sa mungkahing hybrid o online setup para sa mga delegado mula Corcuera.
Bago ang kompetisyon, nagkasundo umano ang mga coach na maaaring payagan ang virtual o hybrid setup para sa mga individual events sakaling hindi makatawid ang mga delegado mula Corcuera.
Gayunman, hindi umano kabilang dito ang Radio Broadcasting at iba pang group events, dahil sa mga alituntunin sa pagbabantay sa mga kalahok at sa proseso ng pagse-seal ng mga laptop at iba pang kagamitan bago ang kompetisyon.
May ilang paaralan naman mula Corcuera, kabilang ang Mangansag Elementary School, na maagang nakapagpasya at nakasakay sa regular na biyahe ng pambot patungong Calatrava kaya nakarating sa venue ng RACE.
Samantala, nahirapan namang makabiyahe ang ilang delegadong humabol sa mga sumunod na biyahe dahil hindi na sila nakasakay sa pambot bunsod ng ipinatupad na passenger cut-off.
Ayon sa Division Office, hindi na rin pinagbigyan ang huling hirit para sa hybrid setup at late arrival dahil maaari itong magdulot ng hindi patas na kompetisyon sa ibang mga kalahok.
Ipinaliwanag na kung darating ang isang koponan sa hapon, maaaring tapos na ang oryentasyon, scriptwriting at rendering ng ibang kalahok habang magsisimula pa lamang ang naturang koponan.
Dahil dito, nanindigan ang Division Office na kailangang isaalang-alang ang parehong kaligtasan at patas na pagpapatupad ng mga alituntunin sa kompetisyon.
Hinimok naman ng pamunuan ang lahat ng sangkot na maging bukas sa mga hindi inaasahang sitwasyon, partikular sa mga pagkakataong naaapektuhan ng kondisyon ng panahon ang pagbiyahe ng mga delegado.
Ayon sa Division Office, isinagawa ang mga naging adjustment nang may pagsasaalang-alang sa kaligtasan ng mga mag-aaral at guro, gayundin sa mga umiiral na patakaran ng kompetisyon.
Discussion about this post