Mula sa vegetable production, nakapag-ipon at nakapagpalawak ng broiler production ang Linao Vegetable Crops and Grower Association sa Barangay Linao, Calatrava, Romblon bilang karagdagang pagkakakitaan ng mga miyembro nito.
Nagsimula ang samahan noong 2018 sa tulong ng Department of Agriculture – Special Area for Agricultural Development (DA-SAAD) Program, na nagkaloob ng mga binhi at kagamitan para sa kanilang vegetable production.
Matapos ang halos dalawang taon ng pagtatanim, nagsimula silang makapag-ani at kumita mula sa kanilang mga produkto gaya ng talong, okra at ampalaya.
Bilang karagdagang pagkakakitaan, nagsimula rin ang samahan ng broiler production na may mahigit 200 manok. Sa loob ng halos dalawang taon, umabot sa humigit-kumulang ₱400,000 ang naipon nilang pondo mula sa kanilang mga pinagkakakitaang proyekto.
Ginamit ng grupo ang bahagi ng kanilang naipon upang palawakin ang broiler production. Mula sa dating mahigit 200 manok, umabot na sa 700 manok ang kanilang inaalagaan matapos gumastos ng halos ₱170,000 para sa pagpapalawak ng proyekto.
Ayon kay Project Manager Edelyn Mirabete, malaki ang naging tulong ng DA-SAAD Program sa samahan dahil nabigyan sila ng pagkakataong magkaroon ng mga proyektong nagsisilbing karagdagang pagkakakitaan.
Nagpasalamat din si Mirabete sa programa dahil bukod sa vegetable production, nagkaroon sila ng panibagong livelihood project na nakatulong sa pagpapaunlad ng kanilang organisasyon.
Samantala, pinasalamatan ni Calatrava Mayor Robert Fabella ang pambansang pamahalaan sa patuloy na suporta sa mga magsasaka at samahan sa kanilang bayan.
“Ako ay nagpapasalamat sa suporta na nagmumula sa ating Presidente Bongbong Marcos, sa ating Secretary Kiko Laurel Jr. ng Department of Agriculture at kay Atty. Christopher R. Bañas ng DA MIMAROPA, ito ay sa walang humpay na suporta na binibigay sa aking mga kababayan dito sa Calatrava,” ani Fabella.
Ayon pa sa alkalde, ang tagumpay ng grupo sa Barangay Linao ay bunga ng suporta ng national government at pagsisikap ng mga residente.
“Ang success ng RTL sa Barangay Linao ay dahil sa suporta ng national government at sa sipag ng aking mga kababayan sa Barangay Linao,” dagdag niya.
Umaasa si Fabella na makatutulong ang proyekto sa kabuhayan ng mga miyembro ng samahan at magsilbing halimbawa para sa iba pang mga benepisyaryo ng SAAD projects sa Calatrava.
“Nawa ay itong proyektong ito ay makatulong sa kanilang hanapbuhay, dagdag kita, at maging magandang ehemplo sa ibang SAAD project dito sa Calatrava. Maging magandang ehemplo din sa iba pang proyekto na tinatanggap ng ibang asosasyon dito sa Calatrava,” ani Fabella.
Sa pamamagitan ng kita mula sa vegetable at broiler production, patuloy na napapalago ng Linao Vegetable Crops and Grower Association ang kanilang mga proyekto at nabibigyan ng karagdagang oportunidad na kumita ang mga miyembro ng samahan.
