Humiling ang Lokal na Pamahalaan ng San Jose sa Philippine Charity Sweepstakes Office (PCSO) ng sea transport vehicle na maaaring gamitin sa pagdadala ng mga pasyente at iba pang nangangailangan ng agarang serbisyong medikal sa mga island community.
Kamakailan ay nagtungo sa main office ng PCSO sa Mandaluyong City si San Jose Mayor Ronnie Samson upang personal na ihatid ang mga dokumentong kaugnay ng kahilingan ng bayan.
Ang kahilingan ay inihain kasunod ng plano ng PCSO na mamahagi ng Landing Craft Vessel (LCV) sa mga island province upang mapabuti ang patient transport sa mga lugar na hiwalay ng dagat.
Ayon sa PCSO, ang LCV ay idinisenyo bilang isang uri ng “mini RORO” na maaaring sakyan mismo ng ambulansya, kaya maaaring manatili ang pasyente sa loob ng ambulansya mula sa pag-alis hanggang sa pagdating sa pagamutan.
Layunin nitong mapabilis ang transportasyon ng mga pasyente, medical responders at mahahalagang medical supplies sa mga geographically isolated and disadvantaged areas (GIDAs), partikular sa mga komunidad na nahaharap sa limitadong transportasyon at hamon sa kondisyon ng dagat.
Ang inisyatiba ay bahagi ng programa ng PCSO na palakasin ang access sa healthcare sa mga island municipality at iba pang liblib na lugar.
Para sa San Jose, ang pagkakaroon ng sea transport vehicle ay makatutulong sa pagdadala ng mga pasyenteng nangangailangan ng karagdagang pagsusuri o paggamot sa mga pasilidad pangkalusugan sa labas ng kanilang isla.
Discussion about this post