Arestado ang isang lalaking itinuturong suspek sa di umano ay pagnanakaw ng pera mula sa isang kwarto sa isang simbahan sa Barangay Poblacion sa bayan ng Looc, Romblon. Ang suspek, nakilala matapos makunan umano ng CCTV ng munisipyo na pumasok at lumabas ng compound ng simbahan.
Matapos ang insidente, nagtago diumano ang suspek sa Barangay Guinhayaan.
Natunton ang kanyang kinaroroonan matapos magbigay ng impormasyon ang dalawang kabataan na nakakita umano sa lugar kung saan ang lalaki.
Upang maiwasan ang anumang kaguluhan sa pagsasagawa ng operasyon, nagpanggap na mga nakikilamay ang mga tauhan ng pulisya at nagtungo kung saan ang suspek. Nang makumpirma ang kanyang pagkakakilanlan, agad siyang inaresto ng mga pulis.
Ayon sa pulisya, ilang beses na umanong nahuli ang suspek dahil sa mga kahalintulad na insidente ng pagnanakaw. Gayunman, hindi naituloy ang mga naunang kaso dahil hindi na nagsampa ng pormal na reklamo ang mga dating biktima.
Samantala, may impormasyon din umano ang mga awtoridad na maaaring may suliranin sa pag-iisip ang suspek. Gayunman, kinakailangan pa itong dumaan sa kaukulang pagsusuri upang matukoy ang kanyang kondisyon.
Hindi pa malinaw sa mga biktima kung sila ay magsasampa ng kaukulang reklamo laban sa suspek.
