Isang ibong kabilang sa pangkat ng raptors o birds of prey, na lokal na tinatawag na lawin o banog, ang nasagip matapos matagpuang palutang-lutang sa dagat sa bahagi ng Sitio Puro, Island, Santa Fe, Romblon.
Natagpuan ni Ricky Malacad, residente ng Inobahan, Poblacion, San Jose, Romblon, ang ibon habang nangingisda sa nasabing bahagi ng karagatan.
Agad na sinagip ni Malacad ang ibon at inilagay sa isang ligtas na lalagyan upang maprotektahan ito matapos matagpuang nasa tubig.
Noong Sabado, inihatid naman ng kanyang manugang ang ibon sa Municipal Environment and Natural Resources Office (MENRO) ng Pamahalaang Bayan ng San Jose para sa nararapat na pangangalaga at assessment sa kondisyon nito.
Nakatakda rin itong i-turn over sa DENR-PENRO para sa masusing pagsusuri sa kalagayan at kalusugan ng ibon, gayundin sa kaukulang intervention at pangangalaga.
Sa ilalim ng Republic Act No. 9147 o Wildlife Resources Conservation and Protection Act of 2001, may mga itinakdang probisyon para sa proteksyon at pangangalaga ng wildlife. Hinihikayat ang publiko na makipag-ugnayan sa mga kinauukulang tanggapan kapag may nakitang wildlife na nangangailangan ng tulong.
Discussion about this post