Isang Green Sea Turtle o pawikan (Chelonia mydas) ang nailigtas matapos aksidenteng sumabit sa lambat ng isang mangingisda sa karagatan malapit sa Barangay Buenavista, Looc, Romblon.
Ayon sa Looc Public Information Office (PIO), unang nakita ni Ivan Palacio Conanan Jr. ang pawikan na sumabit sa lambat. Sa halip na ituring itong huli, agad niya itong ini-report sa mga kinauukulan upang matiyak ang kaligtasan ng hayop.
Agad namang rumesponde ang Municipal Fisheries and Aquatic Resources Management Council (MFARMC) at Coastal Resources Management (CRM) Team, sa pangunguna ni Susan Noche, kasama sina MFARMC Vice President Joseph Gregorio at miyembro nitong si Richard Fabellar.
Matapos suriin ang kondisyon ng pawikan at matiyak na wala itong malubhang pinsala, agad itong ibinalik at pinakawalan sa dagat upang makabalik sa natural nitong tirahan.
Ang Green Sea Turtle ay isang endangered species sa Pilipinas, batay sa Updated National List of Threatened Philippine Fauna and Their Categories sa ilalim ng DENR Administrative Order No. 2019-09. Mahigpit ding pinoprotektahan ang mga pawikan sa ilalim ng Republic Act No. 9147 o Wildlife Resources Conservation and Protection Act.
Discussion about this post