Binigyang-diin ng Municipal Environment and Natural Resources Office (MENRO) ng Odiongan ang kahalagahan ng pangangalaga sa kalikasan bilang bahagi ng proteksyon sa yamang-dagat ng bayan.
Ayon kay Engr. Raymund Inocencio ng MENRO Odiongan, kabilang sa mga kailangang bantayan ang tagtuyot, dahil maaari itong makaapekto sa mga isda.
Mahalaga rin umano ang patuloy na information and education campaign upang mas maunawaan ng mga residente kung paano maiiwasan at matutugunan ang mga gawaing nakasisira sa kalikasan.
Ipinaliwanag ni Inocencio na ang pagkasira ng mga bundok ay maaari ring magkaroon ng epekto sa karagatan. Kapag nagkaroon ng pagbaha, maaaring matangay patungo sa dagat ang dumi at basura mula sa mga lugar na nasira, na maaari namang makaapekto sa mga bahura na nagsisilbing tirahan ng mga isda.
“Kapag bumabaha ay bumababa sa dagat yung dumi at mga basura na lubos na nakakaapekto sa dagat at ang ilan ay sa mga bahura na tirahan din ng mga isda,” ani Inocencio.
Binigyang-diin din niya ang kahalagahan ng maayos na pamamahala ng basura, dahil maaari rin itong magkaroon ng epekto sa kalikasan at yamang-dagat.
Sinabi ni Inocencio na nagsasagawa na ng mga hakbang ang Lokal na Pamahalaan ng Odiongan upang mabawasan ang paggamit ng mga single-use plastic at mapabuti ang pagtatapon ng mga basurang plastik.
Kabilang dito ang programa ng lokal na pamahalaan para sa maayos na pag-dispose ng mga plastic materials.
Sa pamamagitan ng mga hakbang na ito, layunin ng lokal na pamahalaan na mabawasan ang mga gawaing nakasisira sa kapaligiran at mapangalagaan ang mga yamang-dagat na mahalaga sa komunidad.
