Dalawang mangingisda ang inaresto ng Coast Guard Sub-Station (CGSS) Cajidiocan matapos umanong mahuling gumagamit ng compressor bilang underwater breathing apparatus sa kanilang pangingisda sa katubigan ng Barangay Danao, Cajidiocan, Romblon.
Naganap ang insidente habang pabalik sa kanilang sub-station ang Search and Rescue (SAR) Team ng CGSS Cajidiocan matapos magsagawa ng operasyon para sa mga mangingisdang nawawala sa gitna ng hindi magandang kondisyon ng panahon.
Napansin umano ng mga tauhan ng Coast Guard ang isang kahina-hinalang motorbanca na nagsasagawa ng pangingisda kaya agad nila itong nilapitan upang beripikahin ang aktibidad.
Dito umano naaktuhan ang dalawang mangingisda, kapwa residente ng Barangay Cambalo, Cajidiocan, na gumagamit ng compressor habang nasa ilalim ng tubig upang mangisda. Itinuturing ng awtoridad na paglabag ito sa Municipal Ordinance No. 03-11, Section 67, o Comprehensive Fishery Ordinance of Cajidiocan, Romblon.
Ipinaalam sa dalawang indibidwal ang kanilang paglabag at ipinaunawa rin sa kanila ang kanilang mga karapatang konstitusyonal.
Nakumpiska ng PCG ang isang motorisadong fishing boat, makina, compressor engine, aluminum air tank compressor, pares ng flippers, spear gun, tinatayang 100 metro ng hose, 15 kilo ng sari-saring isda, goggles at flashlight.
Tinatayang nasa ₱90,700 ang kabuuang halaga ng motorbanca, mga kagamitang pangisda at nakuhang isda.
Dinala ang dalawang mangingisda, kasama ang motorbanca, mga nakumpiskang kagamitan at huli, sa CGSS Cajidiocan para sa kaukulang dokumentasyon at imbentaryo.
Pansamantalang isinailalim sa kustodiya ang mga indibidwal habang isinagawa ang kinakailangang proseso. Samantala, siniguro ang seguridad ng motorbanca at mga nakumpiskang kagamitan habang hinihintay ang kanilang turnover sa Municipal Agriculture Office (MAO) ng Cajidiocan para sa kaukulang administrative action.
Patuloy namang ipinahayag ng Philippine Coast Guard ang commitment nito sa pagpapatupad ng mga batas pangisdaan at lokal na ordinansa, pangangalaga sa yamang-dagat at proteksiyon sa kabuhayan ng mga lehitimong mangingisda.
